இரு கட்சிகளைச் சேர்ந்தவர்களிடமிருந்தும் விமர்சனங்கள் எழுந்துள்ள நிலையில், ரஷ்யாவிலிருந்து அமெரிக்காவிற்கு டீசல் இறக்குமதி செய்வதற்கு தற்காலிகமாக அனுமதி வழங்கிய தனது கடந்த வார முடிவை அமெரிக்க ஜனாதிபதி டொனால்ட் ட்ரம்ப் நியாயப்படுத்தியுள்ளார்.
அமெரிக்க மக்களின் நலனைக் கருத்திற்கொண்டே தனது நிர்வாகம் இந்த நடவடிக்கையை எடுத்ததாக அவர் தெரிவித்துள்ளார்.
தனது Truth Social சமூக வலைத்தளத்தில் பதிவிட்டுள்ள ட்ரம்ப், ரஷ்யாவிடமிருந்து ஐரோப்பிய ஒன்றியம் கடந்த காலங்களில் எரிசக்திப் பொருட்களைக் கொள்வனவு செய்தமை தொடர்பில் ஊடகங்கள் கவனம் செலுத்தவில்லை எனக் குற்றஞ்சாட்டி, அவற்றின் இரட்டை நிலைப்பாட்டை விமர்சித்துள்ளார்.
“ஐரோப்பிய ஒன்றியம் ரஷ்யாவிற்கு எரிசக்திக்காக 250 பில்லியன் டொலர்களைச் செலுத்தியுள்ளது.
ஆனால், போலிச் செய்திகள் வெளியிடும் ஊடகங்கள் இந்த விவகாரத்தைப் பற்றிப் பேச விரும்பவில்லை” என ட்ரம்ப் குறிப்பிட்டுள்ளார்.
ட்ரம்ப் இந்தத் தொகை குறித்த விரிவான விளக்கத்தை வழங்கவில்லை என்றாலும், 2022ஆம் ஆண்டு உக்ரைன் மீதான ரஷ்யாவின் படையெடுப்புக்குப் பின்னர், ரஷ்யாவிலிருந்து எரிபொருட்களை இறக்குமதி செய்வதற்காக ஐரோப்பிய ஒன்றியம் செலவிட்ட தொகையின் தோராயமான மதிப்பீடாக இது கருதப்படுகிறது.
இதற்கிடையில், ரஷ்ய எரிசக்தி மீதான சார்புநிலையைப் படிப்படியாக முடிவுக்குக் கொண்டுவரும் திட்டமொன்றை ஐரோப்பிய ஆணைக்குழு ஆரம்பித்துள்ளது.
தனது எரிசக்திக் கொள்கையை நியாயப்படுத்திய ட்ரம்ப், “அமெரிக்க மக்களுக்காக நான் சரியான முடிவை எடுத்துள்ளேன் — எப்போதும் அமெரிக்காவுக்கே முதலிடம்!” என்றும் தெரிவித்துள்ளார்.
ரஷ்ய ஜனாதிபதி விளாடிமிர் புடினுடன் ட்ரம்ப் மேற்கொண்டதாகக் கூறப்படும் ரஷ்யாவிலிருந்து டீசல் கொள்வனவு செய்வதற்கான உடன்பாடு, அமெரிக்கா, உக்ரைன் மற்றும் ஐரோப்பிய நாடுகளின் அதிகாரிகள் மத்தியில் அதிருப்தியை ஏற்படுத்தியுள்ளது.
